اللہ تعالیٰ نے حضرت مولانا شاہ حکیم محمد اختر صاحب رحمۃ اللہ علیہ کواپنی محبت کا جو درد عطا فرمایا اورآپ سے جو تزکیہ نفس کا کام لیا ہے وہی حضرت کی بے پناہ قبولیت کا شاہد ہے ۔ جنوبی افریقہ کےاحباب کی دعوت پر1990 سے 2004 تک تقریبا ہرسال اوربعض مرتبہ سال میں دومرتبہ حضرت جنوبی افریقہ کا سفرفرماتے رہے ۔ جنوبی افریقہ میں اللہ تعالیٰ نے حضرت اقدس سے دین کا جوعظیم الشان کام لیا ہے خواص وعوام سب اس کے شاہد ہیں کہ گناہوں کی دلدل میں پھنسے ہوئے ہزاروں سے متجاوزلوگ حضرت اقدس کی صحبت با برکت اورنگاہ پراثر کی برکت سے روح و قلب کا تزکیہ کروا کے اللہ والے ہو گئے ۔ پیش نظر کتاب 1998ء میں ہونے والے حضرت اقدس رحمۃ اللہ علیہ کے جنوبی افریقہ کے آٹھویں سفر کے ارشادات کا مجموعہ ہے ۔

سید عشرت جمیل میر رحمہ اللہ تعالیٰ لکھتے ہیں کہ میں نے جب حضرت اقدس کا پہلا سفرنامہ لکھنا شروع کیا تھا تو اُسی وقت حضرت والا نے فرمادیا تھا کہ میرے سفرنامہ میں دنیا کے حالات اور جغرافیائی معلومات وغیرہ کبھی نہ لکھنا بلکہ مجھ سے جو اللہ کی محبت کی باتیں سنتے ہو وہی تحریر کرنا ۔ لہذا ہمیشہ کی طرح اس سفر میں بھی مختلف مقامات پر ہونے والے حضرت رحمہ اللہ تعالیٰ کے ارشادات کو محفوظ کرتا رہا ۔ پھر سفر سے واپس پر انکی اشاعت کا کام شروع کردیا تھا ۔