توشہ آخرت

ہر مسلمان کے لئے اس کی زندگی کے تمام مرحلوں میں عبادات، معاملات اور تعلقات بہرکیف سبھی امور میں شریعت مطہرہ کی رہنمائی موجود ہے ۔ ہر دور میں علمائے اسلام اور مفکرین کرام نے اسلام اور تعلیمات اسلام کی تعبیر و تشریح میں مختلف عنوانات پر کتابیں تصنیف کی ہیں ۔ انہی میں امام غزالی رحمہ اللہ تعالیٰ بھی ہیں جنہوں نے اسلام کی بڑی خدمت کی ہے ۔

آج یورپ کے مستشرقین بھی آپکے علمی کمالات کے معترف ہیں ۔ آپکی بے شمار تصانیف ہیں جن میں احیاء علوم الدین، کیمیائے سعادت، احیاء العلوم وغیرہ شامل ہیں ۔ مگر چند عام افراد نے امام غزالی رحمہ اللہ تعالیٰ سے یہ کہا کہ اتنی بڑی بڑی کتابیں ہماری دسترس سے باہر ہیں یہ تو علماء کے لئے ہیں ۔ ایسی کوئی مختصر لیکن جامع و مانع کتاب تصنیف کریں جو ان سب کتابوں سے مستغنی کردے۔ چنانچہ امام صاحب رحمہ اللہ تعالیٰ نے ان لوگوں کی رائے سے یہ کتاب زاد الآخرۃ تصنیف فرمائی ۔

اس مختصر سی کتاب میں انہوں نے ایک عامی، عالم، طالبعلم اور تاجر وغیرہ یعنی سب کے لئے تمام زندگی کام دینے والی ہدایات لکھی ہیں ۔