جمعہ مبارکہ کے فضائل و احکام

Description

اسلامی تعلیمات میں “جمعہ کا دن” انتہائی مبارک اور مہتم و عظیم الشان دن ہے ۔ اسی برکت و اہمیت اور عظمت کی وجہ سے اس دن کو جمعہ مبارکہ کا نام دیا جاتا ہے ۔

جمعہ کے دن نماز جمعہ کی فضیلت و اہمیت تو اپنی جگہ ہے لیکن جمعہ کے دن میں اور بھی کئی عظیم الشان فضیلتیں پائی جاتی ہیں اور کئی فضیلت و عظمت والے اعمال بھی اس دن کے ساتھ وابستہ ہیں ۔ متعدد احادیث میں جمعہ کو ہفتہ وار عید قرار دیا گیا ہے ۔ جمعہ کے دن انتہائی عظمت وقبولیت والی گھڑی آتی ہے ۔

اسکے علاوہ جمعہ مبارکہ یا اس دن یا اس کی رات کے حوالہ سے وارد ہونے والی بعض احادیث و روایات سند کے اعتبار سے کمزور یا ناقابل اعتبار ہیں جن کی عوام میں شہرت پائی جاتی ہے اور انکی بنیاد پر بعض نظریاتی وعملی غلو وبے اعتدالیاں سامنے آرہی ہیں ۔

مؤلف کتاب مفتی رضوان احمد صاحب لکھتے ہیں کہ جمعہ مبارکہ کے دن اور جمعہ کی نماز کی فضیلت اور اہمیت کے پیش نظر بندہ نے کچھ عرصہ پہلے ایک کتاب جمعۃ المبارک کے فضائل و احکام کے نام سے ترتیب دی تھی جو اُس وقت تک بندہ کی دیگر تالیفات سے حجم میں زیادہ تھی پھر بعد میں بندہ کی اور بھی کئی کتب اس سے زیادہ حجم و ضخامت کی شائع ہوتی رہی ہیں ۔

جب اس کتاب کا پہلا ایڈیشن ختم ہوگیا تو بندے نے دوبارہ اشاعت سے پہلے اس کتاب کے تمام مباحث و جزئیات پر نظرِ ثانی، تحقیق و تخریج اور فقہی مسائل میں توسیح کا اہتمام کیا ہے اور جن مسائل میں بندے کی رائے تبدیل ہوگئی تھی اُنکو بھی دلائل کے ساتھ جدید موقف کے مطابق مرتب کرنے کا اہتمام کیا ہے ۔ ساتھ ہی جو احادیث وروایات جو پہلے ایڈیشن میں اسناد کی تحقیق کا موقع میسر نہ آنے کی وجہ سے شامل کرلی گئی تھیں اُنکی اسنادی حیثیت کی بھی تحقیق کی جس کے نتیجہ میں بعض احادیث وروایات اسناد کے اعتبار سے ضعیف یا غیر معمولی ضعیف وناقابل اعتباد معلوم ہوئیں اور انکی اسناد کی حیثیت کی وضاحت ضروری معلوم ہوئی ۔

Additional information